اسلام آباد۔10مارچ (اے پی پی):وزیراعظم عمران خان آکھیے جو پاکستان تجارت، سرمایہ کاری، توانائی اتے عوامی وفد دے رابطے دے ذریعے وسطی ایشیا دے ملکاں دے نال نیڑے تعلقات کیتے پرعزم اے ،پاکستان ازبکستان دے نال مختلف شعبیں اچ ݙو پاسے تعاون کوں ودھارا ݙیسی ،پاکستان ،ازبکستان اتے افغانستان وچال مجوزہ ریلوے منصوبے تے وختی عملدرآمد دیاں کوششاں دی حمایت کریندوں ، پاکستانی بندرگاہیں وسطی ایشیائی ملکاں کیتے سمندری تجارت دا مختصر ترین رستہ ہن ، افغان مسئلہ دا مذاکرات دے ذریعے پر امن حل ضروری اے ، جنوبی ایشیا اچ پائیدار امن اتے اقتصادی ترقی پراݨے جھیڑے دے پرامن حل نال ممکن اے۔ اے ڳالھ انہاں ٻدھ کوں ازبکستان دے وزیر خارجہ ڈاکٹر عبد العزیز کاملوف نال ڳالھ مہاڑ کریندے ہوئیں آکھی اے جنہاں اتھاں انہاں نال ملاقات کیتی ۔جمہوریہ ازبکستان دے وزیر خارجہ وزیر اعظم کیتے صدر شوکت مرزیوف ولوں نیک خوہشات دا اظہار کیتے تے مختلف شعبیں اچ پاکستان دے ݙو طرفہ تعاون کوں ودھاوݨ دے عزم دااعادہ کیتے ۔ وزیر اعظم عمران خان بیجنگ اتے بشکیک اچ صدر میرزیوف دے نال ملاقاتاں دا ذکر کیتا تے ازبکستان دے صدر کوں پاکستان دے دورے دی دعوت دا اعادہ کیتا۔ ݙوہیں ملکاں وچال تاریخی تے تہذیبی رابطے دا ذکر کریندے ہوئیں وزیراعظم ایں ڳالھ تے زور ݙتے جو پاکستان ازبکستان دے نال آپݨے نیڑے برادرانہ تعلقات کوں اہمیت ݙیندے ۔وزیر اعظم خاص طور تے ایں امر تے زور ݙتے جو تجارت اچ ودھارے تے علاقائی رابطے معاشی ترقی اچ بنیادی اہمیت رکھیندے۔ وزیر اعظم تجارت ، سرمایہ کاری ، توانائی اتے عوامی دوریں دے ذریعے وسطی ایشیادے نال نیڑے رابطے کوں ودھارا ݙیوݨ دے پاکستان دے عزم دا ذکر کیتا۔
