سپریم کورٹ دا رحیم یار خان مندر حملہ اچ ملوث ملزمان کوں گرفتار کرݨ، شرپسندی تے اکساوݨ آلے لوکاں دے خلاف کاروائی دا حکم ، قابل افسران ہوندے تاں ہݨ اے مسئلہ حل تھی چکیا ہوندا ، چیف جسٹس

اسلام آباد۔6اگست (اے پی پی) سپریم کورٹ دا رحیم یار خان مندر حملہ اچ ملوث ملزمان کوں گرفتار کرݨ، شرپسندی تے اکساوݨ آلے لوکاں دے خلاف کاروائی دا حکم ݙے ݙتے ۔ عدالت عظمی آئی جی اتے چیف سیکرٹری پنجاب توں ھک ہفتے اچ ملزمان دے خلاف کارروائی وچ پیشرفت تے رپورٹ منگ ڳھدی اے ۔ عدالت عظمی مندردی مرمت اتے بحالی دے خرچے وی ہر صورت ملزمان توں وصول کرݨ دا حکم ݙتے ۔ سپریم کورٹ متاثرہ علاقے اچ قیام امن کیتے ویلج کمیٹی تے پنجاب اچ مذہبی ہم آہنگی کیتے امن کمیٹیاں قائم کرݨ دی ہدایت کریندے ہوئیں قرار ݙتے جو یقینی بݨایا ونڄے جو اڳوں ایجھے واقعات نہ تھیون ، جمعے کوں چیف جسٹس گلزار احمد دی سربراہی اچ ݙو رکنی بینچ رحیم یار خان اچ مندر تے حملے دے واقعہ تے ڳھدے ڳئے از خود نوٹس کیس تے سماعت کیتی ۔ چیف سیکرٹری اتے آئی جی پنجاب عدالت دے سامݨے پیش تھئے ۔ دوران سماعت چیف جسٹس گلزار احمد پچھیا جو مندر تے حملہ تھئے انتظامیہ اتے پولیس کیا کریندی پئی ہئی ۔ دوران سماعت آئی جی پنجاب انعام غنی عدالت کوں ݙسایا جو اسسٹنٹ کمشنر (اے سی )اتے اسسٹنٹ سپرٹینڈنٹ پولیس ( اے ایس پی ) موقع تے موجود ہن ، انتظامیہ دی ترجیح مندر دے آس پاس 70 ہندو گھراں دا تحفظ ہئی ،مقدمہ اچ دہشت گردی دی دفعات لاتیاں ڳئن ، ایں دوران چیف جسٹس گلزار احمد ریمارکس ݙتے جو ھک 8 سال دے ٻال دی وجہ توں اے سارا واقعہ تھئے ، واقعہ توں پوری دنیا اچ پاکستان دی بدنامی تھئی ،پولیس سوائے تماشا ݙیکھݨ دے کجھ نی کیتا۔ دوران سماعت جسٹس قاضی امین پچھیا جو کیا کوئی گرفتاری کیتی ڳئی اے جیں تے آئی پنجاب عدالت کوں ݙسایا جو حالی تئیں کوئی گرفتاری نی تھئی ۔ دوران سماعت ایڈیشنل اٹارنی جنرل سہیل محمود عدالت کوں ݙسائے جو وزیر اعظم عمران خان وی معاملہ دا نوٹس ڳھدے ۔ دوران سماعت چیف جسٹس گلزار احمد ریمارکس ݙتے جو واقعے کوں ترائے ݙینھ تھی ڳئن تے ھک وی بندہ نی وٹھیا ۔واقعہ تے پولیس دی ندامت ݙیکھ تے لڳدے جو پولیس اچ جوش کائنی ۔پنجاب پولیس اچ پروفیشنل لوک ہوندے تاں ہݨ تئیں معاملات حل تھی چکے ہوندے۔ہندواں دا مندر ݙھاݙتے ،سوچو انہاں دے دل تے کیا گزری ہوسی،سوچو جے مسیت ݙھا ݙتی ویندی تاں مسلماناں دا کیا ردعمل ہوندا۔پنجاب پولیس اچ کوئی پروفیشنل بندا کائنی۔8 سال دے ٻال کوں مبینہ توہین مذہب تے پولیس گرفتار کر ڳھدے ۔کیا پنجاب پولیس اچ کڄھ عقل تے شعور کائنی۔8 سال دے ٻال کوں کیا پتہ جو کون ہندو اے تے کون مسلمان۔8 سال دے ٻال کوں گرفتار کرݨں آلے ایس ایچ او کوں فوری فارغ کرو،کرک اچ مندر ساڑ ݙیوݨ دے علاوہ ٻئے واقعات تے عدالتی حکم دے باوجود کجھ نی کیتا ڳیا ،اساݙی پولیس تے انتظامیہ واقعہ تھی ونڄݨ دے بعد کم شروع کریندن ،کیا ایجھا کوئی نظام نی بݨایا ونڄ سڳدا جیں تے واقعہ تھیوݨ توں پہلے روک ݙتا ونڄے ، سماعت وچ آئی پنجاب عدالت کوں متعلقہ ایس ایچ او کوں معطل کر تے ایندے خلاف محکمانہ کارروائی کرݨ دا یقین ݙویندے ہوئیں موقف اپنائے جو رحیم یار خان دے علاقے بھونگ اچ مسیت ،امام بارگاہ اتے مندر ںال نال ہن،امام بارگاہ اچ لڳیے علم کوں وی ساڑیا ڳئے جیں دی ایف آئی آر درج کر چکیو،مندر،امام بارگاہ اتے موٹر وے بند کرݨ تے ترائے مقدمیں درج کیتے ڳئن ۔عدالت کوں یقین ݙوینداں جو ویڈیو ثبوتاں دے نال سارے ملزمان کوں گرفتار کریسویوں ۔دوران سماعت ہندو کونسل دے پیٹرن ان چیف و رکن قومی اسمبلی رمیش کمار موقف اپنائے جو لوکاں کوں اکساوݨ آلے عبدالرزاق سومرو کوں حالی تئیں گرفتار نی کیتا ڳیا ۔اٹھ سال دے ٻال کوں وی ماریا ڳئے جیں دی وجہ توں مسیت دی لائبریری اچ اوندا پیشاب نکل ڳئے،مقامی لوکاں واقعہ کوں حقیقت دے برعکس پیش کیتے۔ دوران چیف جسٹس گلزار احمد ریمارکس ݙتے جو پولیس دی جمع کرائی ڳئی رپورٹ اچ معلومات دے سوا کجھ کائنی ،واقعہ کوں ترائے ݙینھ تھی ڳئن کوئی گرفتاری نی تھئی ۔