اسلام آباد۔5اپریل (اے پی پی): سینیٹ عوام کوں انسداد کورونا ویکسین دی مفت یا اصل قیمت تے ݙیوݨ دی قرار داد منظور کرڳھدی۔ قرار داد دی حمایت اچ 43 اتے مخالفت اچ 31 ووٹ پئن ۔سنوار کوں سینیٹ اچ سینیٹر کامران مرتضیٰ قرارداد پیش کیتی جو کورونا وائرس دی وبانال نبݨݨ کیتے سارے ملک اپݨے شہریاں کوں مفت ٹیکہ جات لواوݨ کیتے آپݨے وسائل منتقل کرݨ کیتے کوشاں ہن جݙاں جو ملک اچ صرف بزرگ شہریاں تے فرنٹ لائن ہیلتھ ورکرز کوں ٹیکے لاوݨ کوں ترجیح ݙتی ڳئی اے ۔روسی ساختہ انسداد کورونا ویکسین سپٹنک نجی فرم کوں درآمد کرݨ دی اجازت ݙتی اے اتے عالمی منڈی دی قیمت 1500 روپے دے برعکس انہاں دیاں ݙو خوراکاں دی قیمت 8400روپے مقرر کیتی ڳئی اے ۔ عوام کیتے ممکن کائنی جو انسداد کورونا دی ویکسین دی ٻہوں قیمت ادا کرن ۔ قرار داد اچ زور ݙتا ڳے جو حکومت عوام کوں انسداد کورونا ویکسین دی مفت یا عالمی منڈی دے مطابق اصل قیمت تے ݙیوے ۔ قرار داد تے بحث اچ حصہ گھندے ہوئیں قائد حزب اختلاف سید یوسف رضا گیلانی آکھیے جو کورونا وائرس دی وبا عالمی وبا اے جیں توں سارے متاثر تھیندے پئن ۔ کورونا توں بچݨ کیتے موثر اقدامات دی لوڑھ اے ۔ ہر بندے کوں ویکسین دی فراہمی یقینی بݨائی ونڄے ۔ جیں توں بعد چیئرمین سینیٹ قرارداد تے ووٹنگ کرائی ۔ قرار داد دی حمایت اچ 43 اتے مخالفت اچ 31 ووٹ پئن۔
